कामरेड लाई पत्र!!

कामरेड लाई पत्र!!
प्रिय कामरेड !
तिम्रा रुमानी भाशणहरु सुनेर
कापी किताब फ्याकियकै हो
हतियार बोकियकै हो
फरक यत्ती हो
तिमी फर्मान गर्थ्यौ
म मोर्चाहरुमा भिडिरहन्थे।
प्रिय कामरेड !
सपना मैले नि देखेकै हो
तिमिले देखायकै हो
फरक यत्ति हो
तिमी साम्यवाद को सपना देख्थ्यौ
म बबुरो
खाना नाना र छाना को सपना देख्थे।
प्रिय कामरेड!
दुश्मन सङ्ग छेलियर
राजधानी टेकेकै हो
तातो सडक मा पसिना पोखेकै हो
फरक यत्ती हो
म भोको पेट कसेर ढुङ्गा बर्साइरहन्थे
तिमी दिल्ली को महल बाट कासन गर्थ्यौ।
प्रिय कामरेड!
क्रान्ती पूरा भो भनिएकै हो
अबिर जात्रा गरिएकै हो
रात भर सडक मा म पनि नाचेकै हो
फरक यत्ती हो
तिमी सिन्हदरबार छिर्यौ
म क्यान्टोनमेन्ट।
प्रिय कामरेड !
म धैर्यता साधेर बसिरहे शिबिर भित्र
मेरो छाती नापियो
बाहिर पठाइयो
कुनै गुनासो नगरेकै हो
फरक यत्ती हो
म कार्यकर्ता बने(योद्धा बाट )
तिमी नेता बन्यौ(कमान्डर बाट)
कामरेड!
समय फेरियो
तिमी मोटाउदै गयौ
म दुब्लाउदै गए
तिमीले न्यानो महल पायौ
मेरो झुपडी को छानो भत्कदै गयो
फरक यत्ती हो
तिमी राजधानी मा मस्त
म 'खाडि 'मा ब्यस्त।
प्रिय कामरेड !
सुन्दैछु अचेल तिमी अप्ठ्यारोमा छौ अरे
रोल्पा रुकुम घुम्दै छौ अरे
नयाँ क्रान्ती को कुरा गर्दै छौ अरे
कामरेड ,
म पनि कहाँ सजिलो मा छु र ?
मरुभुमी मा पसिना चुहाउदै छु
फरक यत्ती हो
तिमिलाइ अझै 'खुन' को सपना छ
मलाइ 'नुन 'को सपना छ
माफ गर कामरेड !अब म तिम्रो योद्धा हुन सक्दिन।